Traysikad driver gipusil patay

Patay ang usa ka drayber sa traysikad human kini pusila sa wala mailhing  tawo kagahapon sa kaadlawon diha sa  barangay Biasong, dakbayan sa Talisay.

Ang biktima giila sa mga polis nga si Edwin Umambac, 30-anyos residente sa maong lugar kinsa nakaangkon og unom ka samad pinusilan sa iyang lawas ang daling gidala sa   Talisay District Hospital apan gideklarar kining patay na sa doktor pag-abot sa maong tambalanan.

Si Pat Watin residente sa lugar ang daling mitaho sa kapolisan kabahin sa maong insidente kinsa ang grupo sa alert team pinangulohan ni SPO1 Ricardo Balbutin ug mga sakop sa  Homicide Section ang daling miresponde sa maong alarma.

Base sa imbestigasyon sa mga polis nga si Umambac ang natulog diha sa traysikad nga iyang gimaneho daplin sa karsada.

Ang nahisgutang kriminal sakay sa usa ka motorsiklo ang kalit lang mitungha ug mipauwan og mga bala ngadto kang Umambac samtang natulog kini.

Ang maong tawo ang daling miikyas human sa hitabo ug ang mga polis mipahigayon og follow-up nga imbestigasyon kabahin sa maong insidente.