Paramedic school sa Mandaue tukuron

Gitinguha sa Emergency Rescue Unit Foundation (ERUF) nga nagbase sa dakbayan sa Sugbo ang pagtukod og professional paramedic and  rescue school sa dakbayan sa Mandaue.                                                                      

Kini ang gipadayag ni Atty Richard Sison sa ERUF atol sa ilang pag-atubang sa konseho sa maong dakbayan sa miaging session nga ilang gihimo niadtong miaging adlaw.

Matud pa niya nga ang paramedic ug rescue nga tulunghaan sa dakbayan maoy labing una sa nasud kun kahatagan kini og katumanan.

Nunot sa mao nilang pag-atubang sa konseho sila misaad  nga ang ERUF   dili  mag-apil-apil  sa politika.

“I am not a politician and we do not belong to a political party,” nagkanayon sa iyang pamahayag ang chairman sa Eruf nga si  Dr. Pek Eng Lim kinsa kuyog ni Atty Sison.

“Our charter will prevail and we’ll attend to everyone regardless of political affiliation,” midugang si Atty Sison.

Hinuon ang konseho  wala pa makahukom alang sa paggahin og salapi sa Eruf sanglit may kaugalingon man kining rescue team.

Ang konseho daw  mipadayag sa ilang pag-uyon nga ang Eruf maoy labing epektibo sa natad sa rescue ug paramedic kun itandi sa mga rescue team nga ubos sa kagamhanan.

Si Mayor Jonas Cortes ang migahin unta sa ERUF sa 2008 budget  og  P1.5 milyones apan gitangtang ang maong kantidad ni Konsehal Emiliano Rosal .

Gipasabot ni Rosal nga sa dili pa mahimo ang paggahin sa konseho sa ERUF sanglit  dili kini accredited sa dakbayan.