500 ka mga street children nigradwar

Mokapin sa 500 ka mga streetchildren sa dakbayan sa Sugbu ang nigradwar sa elementarya, high school, ug kolehiyo sa bag-o lang natapos nga tuig-tingtungha.

Kini maoy gipahibawo ni Annabeth Cuizon, ang executive director sa Cebu City Task Force on Streetchildren nga nahinabi sa Banat News.

Niingon si Cuizon nga sa nahisgutang gidaghanon sa nigradwar, 255 niini sa elementarya, 184 sa high school, 90 sa kolehiyo ug 5 sa vocational courses.

Ang gikalipay ni Cuizon mao ang pagradwar sa upat ka mga tinun-an sa elementarya ug laing upat sa high school nga pulos mga class valedictorian.

Kini giingon ni Cuizon nga maoy nakapadasig kanila sa pagpaningkamot nga mapatungha ang tanang kabataan nga ilang na-rescue sa kadalanan sa dakbayan.

“Ang atong thrust nga matabangan ang mga bata, mahatagan nato og maayong future, so, atong paeskwelahon aron makalingkawas sa ilang kakabus,” sumala ni Cuizon.

“Makatabang usab sila unya sa ilang mga ginikanan, sa ilang mga igsoon ug sa ilang umaabot nga pamilya kung makalampos sila sa pagtoon,” dugang pamahayag ni Cuizon.

Nasayran gikan kang Cuizon nga libuan na ka mga streetchildren nga ilang gipatungha ang nakalampos sa ilang pagtuon, diin ang uban niini giingong tua na sa gawas sa nasod nanarbaho.

Kini sukad namugna ang Cebu City Task Force on Streetchildren pipila ka dekada na ang nakalabay pinaagi sa giingong paningkamot sa unang ginang sa siyudad nga si Margot Osmeña.