Rambol sa Mango Square tulo sikop

Tulo ka tawo ang gidakop human pasanginling nikulata ug nanion og armas sa upat ka tawo diin lakip sa nabiktima usa ka doctor diha sa usa ka imnanan sa Mango Square sa dalan Mango Ave. kagahapon sa kaadlawon.

Giila ni PO1 Ariel Dicdican ang gidakop mao sila si Jose Maria Cal,Jr.; Christopher Pajes; Novem Eduave  samtang nakaeskapo ang kauban nilang wala mailhing babaye.

Samtang giila ni Dicdican sa pakighinabi sa Banat News ang mga mireklamo mao sila si Dr. Ed Hallar; Emmanuel Amador; Neil Go ug Jose Mari Sato kinsa pulos nakaangkon og bun-og sa kalawasan.

Sumala pang Dicdican nahitabo ang rambol alas dos pasado sa kaadlawon ug base sa alegasyon sa mga biktima kalit lang silang giduol sa grupo sa suspek ug gipanukmag sila Hallar ug Amador sa walay igong hinungdan.

Gikatahong dihay nahitabong “rambol” niadtong tungura apan gikatahong usa sa mga suspek ang mibunot og armas ug gitiunan niini ang mga biktima dayong bahad sa pag-ingon: “Umalis na kayo pag hindi kayo umalis pagbabarilin ko kayo.”

Sa kahadlok sa mga biktima dali silang migawas ug nangayo og tabang sa mga polis sa Fuente police station hinungdan sa pagkasikop sa tulo apan giingong walay nakuhang armas niadtong tungura sumala pang Dicdican.

Kagahapon kasong physical injuries ang gipasaka batok sa mga suspek.