Abyon nahagsa

Usa ka abyon ang nahagsa duha ka minutos human sa paglupad niini diha sa Mactan Cebu International Airport sa Mactan Island kagahapon sa buntag nga miresulta sa pagkaangol sa piloto niini.

Ang nahagsa mao ang four-seater Cessna 172 nga gipanag-iya sa Mactan Aviation Technology Center Inc. nga nagbase sa dakbayan sa Lapulapu ug gidala ni Captain Joel Retuya,40.

Si Retuya gikatahong naa sa kritikal nga kundisyon dihang gidala sa Mactan Doctors Hospital ug padayon pang giatiman sa mga doctor atol ning pagsulat sa balita, gumikan sa kadaut nga nahiaguman niini sa kalawasan human sa aksidente.

Sumala pa sa mga opisyal sa Air Transportation Office ang maong abyon padulong sa Ozamiz City aron maghatud og 65 ka sakong pasayan apan pipila ka minutos human sa pagbiya sa ligid niini sa runway nakahagsa kini og balik sa runway.

Base sa report sa operations division sa maong tugpahanan ang maong abyon nibiya alas 7:30 sa buntag apan duha palang ka minutos gikan kini makalupad nahagsa kini diha sa tumoy sa Runway 22.

Daling gidagan sa mga rescue teams sa MCIAA ang crash site ug gikuha si Retuya ug gidala sa tambalanan samtang gidali og bomba og chemical ug tubig ang nagusbat nga abyon.

Mao usab kini ang nakuhang report sa radyo sa Mactan Airport police nga si Jovito Abrenica nga duha ka minutos gikan sa pagbiya sa maong abyon nahitabo ang pagkahagsa niini.

Gikatahong maayong pagkaguba sa maong abyon diin nagusbat ang cockpit, propeller ug ang walang pako niini maayong pagkaguba tungod sa pagkahagsa.

Padayon na karong giimbestigahan ang hinungdan sa pagkahagsa sa maong abyon apan una karong gidudahan mao ang posibilidad nga ‘pilot error,” engine failure, overloading o ba kaha mechanical problem ang hinungdan sa pagkahagsa niini.

Mao kini ang ikatulong aksidente sa Cessna 172 nga nahitabo dinhi sa Central Visayas sulod lang ning tuiga. Niadtong Enero 24, susamang abyon nga gidala ni Capt. Jessup Bajenting ug maoy naghatud kang kanhi Cebu gobernador Emilio Osmeña ang napugos og emergency landing sa lungsod sa Sogod human makasinati og engine trouble.

Tulo ka adlaw human niadto laing Cessna 172 na usab ang nahagsa ug natuwad sa usa ka fishpond sa Inabanga, Bohol hinuon pulos luwas ang mga turistang Hapones nga luwan niini.(Gikan sa The Freeman)