Dunay pagduda ang Cebu City Anti-Indecency Board (CAIB) sa gipasalig sa editor sa local version sa bag-o lang gilusad ug gipagawas nga Playboy Magazine.
Ang Playboy Philippines editor nga si Beting Laygo Dolor nipadayag nga ilang ipahaom ang ilang magazine sa pagka-sensitibo sa mga Pilipino.
Nahimong kontrobersyal ang nahisgutang magazine tungod usab sa giingong mga hilas ug law-ay nga mga hulagway nga gipakita sa international version niini.
Matod sa chairman sa CAIB nga si Doctor Rene Josef Bullecer, nga siya mangita og kopya sa maong magazine aron personal nga masaksihan ang gimantala niining mga hulagway.
Niingon si Bullecer nga kung ilang masuta nga walay kalainan ang maong magazine sa ilang gipang-ban nga mga basahon, kini idugang sa ilang listahan.
“The moment nga makaabot na dinhi sa Sugbu unya makakuha mi og kopya, matan-aw namo nga indecent gihapon, immediately, we will confiscate it,” sumala ni Bullecer.
Lakip sa mga magazine nga una nang gi-ban sa CAIB dinhi sa dakbayan mao ang FHM, UNO, MAXIM ug uban pang mga gihulagway nilang pornographic materials.
Kini subay usab sa pagpatuman sa City Ordinance 1408 nga nagdili sa mga hilas nga mga pasundayag ug basahon dinhi sa siyudad.
“Here in Cebu, we will do our part considering nga duna na man tay in place nga ordinance, ang ato na lang is to implement,” dugang pamahayag ni Bullecer.
Nasayran nga ang ka-obispohan sa Katolikong Simbahan nipadayag na sa ilang negatibong reaksyon labot sa pagpabaligya sa Playboy magazine dinhi sa nasod.