3 samdan sa sunog

Tulo ka tawo ang samaran atol sa sunog sa usa ka panimalay didto sa Barangay Suba-Basbas, dakbayan sa Lapulapu kagahapon sa udto.

Ang nasunog mao ang panimalay nga gipanag-iya sa magsuong Edwin Ngujo ug Editha Tumulak diin nagsugod ang kalayo sulod sa lawak ni Ngujo.

Base sa imbestigasyon ni SFO2 Jumid Alburo ug SFO1 Rodolfo Apa sa kabomberohan sa Lapulapu nasayran nga gumikan sa pag-overheat ug pagbuto sa desk fan nga nahimutang sa lawak ni Ngujo ang  pag-ulbo sa sunog.

Gumikan niini, gisuwayan og luwas ni Tumulak ang iyang inahan nga si Paz Tumulak, 68,  ug pipila ka mga gamit sa panimalay apan nahiagom kini sa mga paso sa   kalawasan.

Si Editha nahiagom sa 2nd degree burn  sa iyang abaga samtang si Paz paso sa aping ug abaga ang nahiaguman niini ug ang usa ka 7 anyos nga bata nga si Kirzia Sollano nabali ang walang bahin sa tiil human kini mapandol atol sa pagdagan niini pahilayo sa maong dapit nga nasunogan.

Hinuon nagpasalamat si SFO1 Apa nga wala makatabok sa uban nga panimalay ang maong sunog ug sa tunghaan sa elementarya nga duol ra usab sa panimalay ni Ngujo.

Lakip sa miresponde mao ang mga bombero sa Philippine Air Force diin nadawat sa kabomberohan ang alarma 10:25 kagahapon sa udto ug ubos kini sa 1st alarm ug nakontrolar sulod sa lima ka minutos.

Base sa imbestigasyon sa kabomberohan gibanabana nga mokabat sa  P250 mil  ang danyos sa maong sunog.