Mag-uuma gi-ambusan

Gi-ambusan ug gipusil patay ang usa ka mag-uuma samtang padulong na untang mopauli sa pinuy-anan niini kauban ang iyang live-in partner didto sa barangay Montealegre,  lungsod sa Tuburan, Cebu niadtong Miyerkules sa alas 9 sa gabii.

Ang biktima nga patay dihadiha giila sa kapolisan nga si Eleazar Goles Aribe, 28,  usa ka mag-uuma ug molupyo sa Sitio Isidro sakop sa nahisgutang barangay.

Ang biktima padulong na unta kining mopauli gikan nga misuroy kauban sa iyang live-in partner apan giatangan kini sa wala pa mailhi nga suspek o mga suspek sa may ngitngit nga bahin ug gipusil.

Ang biktima nakaangkon og samad pinusilan sa iyang tiyan ug dughan hinungdan sa hinanali niining kamatayon.

Gibutyag sa hepe sa Tuburan Police Station, Insp. Rolando Evalle dihang nahinabi sa Banat News nga subay sa ilang nahipos nga impormasyon gikan sa mga silingan sa biktima gitumbok kini nga maoy suspek sa mga pagpangawat nga nahitabo sa ilang lugar.

Gitug-an ni Insp. Evalle nga naglisod pa sila pagtumbok sa suspek tungod kay walay si bisan kinsa nga molupyo sa maong lugar ang nakahatag og impormasyon may labot niini.

Hinuon gitug-an ni Insp. Evalle nga dunay tulo ka basiyo sa bala gikan sa kalibre .45 ang gi-turnover sa kapitan sa Montealegre nga si Lodivico Roquero nga nakuha sa crime scene.

Panimalos ang gitutokang motibo sa nagpadayon nga imbestigasyon sa kapolisan sa maong pagpamusil.