Nilugos og silingan nadakpan

Nasikop sa kapulisan  sa lungsod sa Sogod ang usa ka batan-ong lalaki nga suspetsado sa pagpanglugos og usa ka 17 anyos nga dalagita   sa Poster Village, barangay Maravilla lungsod sa Tabuelan  niadtong niaging tuig.

Ang nasikop atol sa gilusad nga joint operation sa kapulisan sa Tabuelan pinangulohan ni Insp. Camilo Gonzaga ug kapulisan sa Sogod pinangulohan ni Insp. Ramon Lacno mao   si Jijie Maglasang alyas Titing,26 anyos, lumad nga taga sitio Pandayan,barangay Maravilla sa lungsod sa Tabuelan.

Apan didto na masikop ang suspek sa kasamtangan niining gipuy-an sa barangay Damolog, Sogod niadtong Miyerkules sa alas 3:00 sa hapon human nisibat sa ilang lugar ug nagtago-tago tungod sa maong  kaso.

Gibutyag ni SPO1 Cristopher Sanchez, imbistigador sa Tabuelan Police Station niadto pang bulan sa Oktobre sa nilabay'ng tuig nalutsan og warrant of arrest ang suspek gikan sa sala ni RTC branch 59 judge Gaudioso Villarin apan wala dayon nila kini madakpi.

Nasayran nga walay girekomendar nga piyansa ang korte alang sa temporaryong kagawasan niini.

Ang suspek gibalhug na karon sa detention cell sa Tabuelan samtang gi-asikaso pa ang commitment order niini aron mabalhin didto sa Cebu Provincial Detention and Rehabilitation Center (CPDRC).