Anti-rabies Act higpit nang gipatuman-Utlang

Gisugdan na pagpatuman sa kagamhanan sa dakbayan sa Sugbu ang Akta Republika 9482 kon ang Anti-Rabies Act of 2007 sumala pang  Doctor Alice Utlang, ang labaw sa Department of Veterinary Medicine and Fisheries (DVMF).

Matod ni Utlang nga nisugod na paglibot ang iyang mga sakop sa kabarangayan sa dakbayan alang sa pagpatuman sa nahisgutang balaud.

Unang gisuroy sa team nga gihulma ni Utlang mao ang barangay Labangon nga giingong maoy nag-una sa mga kaso sa rabies sa siyudad.

Nag-unang tumong sa team mao ang pagrehistro sa tanang mga iro sa dakbayan, pagbakuna, pagkapon lakip na sa pagpurga niini.

Nalatid sa Anti-Rabies Act nga kadtong mga pet owner nga mapakyas pagrehistro sa ilang binuhing iro mahimong mamultahan og P2 mil.

Laing P500 usab ang multa sa mga tag-iya kung ang ilang iro niuban nila nga wala higti ug libre nga nakasuroy sa dalan.

Mahimo usab nga mamultahan og P25 mil kadtong mga pet owner kansang iro nakapaak og tawo nga dili moangkon og responsibilidad.

Sa unang quarter niining tuiga, mukapin na sa 700 ka mga iro ang narehistro sa siyudad, mas taas itandi sa unang tulo ka buwan sa miaging tuig nga duna lay 471 ka iro nga narehistro.

Sa pikas bahin gipadayag ni Utlang nga laing team usab ang iyang gihulma nga maoy gitahasan pagsuroy sa kadalanan pagsikop sa mga pet owner nga makalapas sa balaod.

Niingon hinoon si Utlang nga sukad gipatuman ang Anti-Rabies Act sa siyudad sugod niining semanaha, wala pay nasikop ang iyang mga sakop.

Matod sa City Veterinarian nga ang pagpatuman sa nahisgutang balaud maoy kabahin sa ilang target paghimo sa dakbayan nga rabies-free sa tuig 2010.