Nagplano si bokal Agnes Magpale, chairman sa Committee on Tourism sa Hunta Probinsyal sa Sugbu nga imbitahon si Monsignor Achilles Dakay, tigpamaba sa Archdiocese sa Sugbu nga mokuyog sa ilang himuong "Suroy-Suroy sa Sugbu" sa mga kalungsoran.
Gusto ni Bokal Magpale nga makita mismo ni Dakay kung unsa ka-epektibo ang maong programa sa Kapitolyo ang "Suroy-Suroy" sa Sugbu.
Sayo niini, nasagmuyo ang bokal human gisaway ni Dakay ang maong programa sa kapitolyo, tungod kay gihulagway niining nag-usik-usik lang sa salapi sa gobiyerno.
Giluwatan ni Dakay ang maong pagsaway human maugdaw sa sunog kumbento ug simbahan sa lungsod sa Oslob ug wala dayon mapalong ang kalayo sa mga nirespondeng kabomberuhan gumikan kay gubaon sad ang firetruck sa lungsod.
Apan si Magpale nagkanayon ang gipang apod-apod nga firetrucks sa mga kalungsoran dunay gipapirmahan ang Kapitolyo nga memorandum nga kung dunay deperensya ang firetrucks dili na tulobagon sa kagamhanang probinsyal kun dili ang lungsod na maoy mogasto sa mga daot niini.