Gisaway ni City Anti Indecency Board (CAIB) Chairman Rene Joseph Bullecer ang nagpadayon nga hubo-hubo sa mga balay kahilayan sa dakbayan sa Mandaue.
Ang iyang pagsaway maoy iyang reaksiyon sa gikataho nga safe sex education program nga gipasiugdahan alang sa mga "freelance boring" nga diin mga kanhi nalambigit sa maong trabaho ang manudlo kanila alang sa "safe sex".
Matud pa ni Bullecer nga dinhi sa Sugbo ang dakbayan sa Mandaue maoy labing daghang balay kahilayan nga nagpasiugda og hubo-hubo.
Si Senior Superintendent Rodel Calungsod, hepe sa Mandaue City Police Office (MCPO) nga gikahinabi sa Banat News kagahapon mipadayag nga pahingusgan niini ang ilang kampanya sa pagsumpo sa hubo-hubo sa mga balay kahilayan.
Dugang pa niya nga ang iyang mga sakop sa intelligence section sa kapolisan ang naghimo na og mga pagpaniid sa maong mga balay kahilayan.
Si Calungsod miingon nga giuna lamang nila sa paghawan ang reclamation area sa dakbayan diin daghang babaye ang nagtanyag og daklit nga kalipay bugti sa bayad.