Nikisikisi na usab ang Urban Poor Consultant sa Cebu City Hall nga si Gerry Marquez nunot sa laing pasangil nga kini nangilkil sa mga vendors.
Ang Urban Poor Consultant gipasanginlang nangolekta og tag dos mil pesos sa mga sidewalk vendors aron magpabilin sa ilang nahimutangan.
Partikular na niini ang mga manindahay diha sa Lapu-Lapu Extension nga gitakda nang i-demolish sa ilang tagsa-tagsa ka mga pwesto.
Gani ang pipila ka mga sidewalk vendors nga mga molupyo sa barangay Basak San Nicolas nisumbong na ngadto sa ilang barangay kapitan nga si George Rama.
Apan ang kapitan niklaro hinoon nga siya dili manginlabot sa maong reklamo ug kini iyang gitugyan ngadto sa Mayor’s Management Team (MMT) sa City Hall.
Ang gipasalig ni kapitan Rama mao ang pagtabang sa mga sidewalk vendors pagpangita og kabalhinan aron makapadayon pagpaninda sa higayon nga ipatuman na ang demolisyon.
Hawanan sa mga manindahay ang Lapu-Lapu Extension tungod kay kini himoon usab nga access road sa South Road Properties (SRP).
Gitakda untang i-demolish ang mga manindahay kagahapong adlawa, apan tungod sa hangyo usab sa kapitan, kini giuswag sa sunod semana.
Gitumbok ni Marquez nga namasangil kaniya nga kurakot mao ang usa ka giingong ahente sa maong mga sidewalk vendors nga ginganlan og Warren Abellanosa.
Gani niingon ang Urban Poor Consultant nga siya musang-at og pormal nga reklamo batok ni Abellanosa tungod sa giingong pagpakauwaw niini kaniya.
“I will file a case against him for libel, gihikay na sa akong abogado ang mga dukumento kay pagpakauwaw nang iya nako,” sumala ni Marquez.
Kung mahinumduman, si Marquez nibahad usab pagpasaka og kaso batok kang ABC president Jingjing Faelnar kaniadto.
Kini dihang si Faelnar nipadayag og pagduda sa kalihukan ni Marquez, tungod usab sa giingong nagkadaghan nga mga sidewalk vendor sa dakbayan.
Ang Urban Poor Consultant subling nipadayag nga siya manginlabot gyud sa mga vendors tungod kay kini giingong usa sa mga tahas nga gisangon kaniya sa mayor