Naunay sa iyang armas

Diriyot mabuta ang usa ka sakop sa CebuTalisay Aqua Gun Club Inc. human ang iyang armas nga gigamit nabungkag ug ang bala misumbalik dihang nag-practice kini og firing sa milabay'ng mga semana sa firing range diha sa barangay Maghaway, dakbayan sa Talisay apan ang maong insidente gi-reprt sa kapolisan kagahapon sa buntag.

Ang biktima mao si Anthony Nuñez, taga San Antonio Village, barangay Banilad dakbayan sa Sugbo.

Si kanhi Bise Mayor Aberdovey Belleza kinsa presidente sa nahisgutang gun club ang mitaho sa maong hitabo diha sa kapolisan sa Barangay Poblacion.

Base sa natala sa blotter sa kapolisan sa Talisay nga gamit ni Nuñez ang iyang Glock 21 kalibre .45 pistol dihang nag-practice kini og firing.

Apan pagpabuto pa niini nabungkag ang maong pusil ug ang bala misumbalik ug milahos kini sa walang bahin sa gisul-ob nga eye protector ni Nuñez hinungdan nga naigo ang mata niini ug miagas ang dugo.

Si Nuñez ang dali usab nga gidala ngadto sa usa sa mga tambalanan niining dakbayan.