City Health gipaninguha ni Rama

Wala mahimuot si Cebu City Vice Mayor Michael Rama sa rason sa City Health Department nganong hangtud karon wala pa ikapatuman ang nutrition program sa dakbayan.

Ang Consultant on Nutrition Program sa siyudad nga si kanhi mayor Doctor Florentino Solon nipahibawo nga nahan-ay na ang programa ug ang kulang niini mao na lang ang implementasyon.

Apan ang City Health Officer nga si Doctor Fe Cabugao mipasabot nga sila “busy” sa ilang kampanya batok sa sakit nga  Dengue ug tipdas.

Alang sa bise mayor, ang rason ni Cabugao dili niya madawat ug kinahanglan nga hatagan usab og panahon ang ubang programa sa dakbayan.

“Being busy is not an excuse, we have to find time, you have to put your mind and you have to put your money where your mouth is,” sumala sa bise mayor.

Upat ka mga barangay nga giingong nag-una sa malnutrition cases sa siyudad maoy gusto ni Solon nga unahon sa paghatag  og pagtagad.

Kini mao ang barangay T. Padilla, San Roque, Mambaling ug Kalunasan nga maoy unang giduaw ni Solon alang sa ilang gipahigayon nga nutrition education.

Partikular nga gihimo ni Solon mao ang pagbansay-bansay ug pagtudlo sa mga barangay health worker labot sa nutrition education ug food security program.

“I wish I can sit down with mayor Solon so that we can have an integrated approach on how to implement the program,” nagkanayon si Rama.

Natribukar ang nutrition program sa dakbayan human mangayo niini og update ang bise mayor atol sa miaging sesyon sa City Council.