Bar passer nga polis pasidunggan sa CCPO

Pasidunggan sa Cebu City Police Office ang bag-uhay pang nipasar sa Bar Exams nga si SPO1 Julius Ompad nga nadestino sa Waterfront police station human sa pito ka pagsuway nga makapasar sa maong pasulit.

Si Ompad mapasalamaton hinuon sa mga tawong nisuporta ug nisalig kaniya ilabi na sa iyang pamilya.

Si Comendador nagkanayon nga mopahimo sila og streamer o ba kaha billboard nga magpasidungog kang Ompad kinsa iyang gihulagway nga maayong himuong ehemplo isip usa ka “pasensyusong” tawo ug wala kawad-i og paglaom.

Matud pang Comendador karong abogado na si Ompad mamahimo na kining mobiya sa PNP o ba kaha magpabilin ug mosulod sa legal service sa kapolisan.

Apan sa pagkakaron gihulagway niining mas angayan karon sa posisyon ni Ompad ang pagka-imbestigador sanglit usa na kini ka abogado apan dili nila pugngan ang maong polis pagpangita og mas hayag nga kaugmaon karong abogado naman kini.

“He may opt to stay in the PNP or join other government offices or he may apply for lateral entry to become an officer of the PNP,” asoy pang Comendador.

Pipila sa mga kaubanan ni Ompad diha sa CCPO nga nikuha usab og abogasya karon ang nakadayeg kaniya tungod sa padayon niining paningkamot bisan makaunom na kini ka higayon nahagbong sa Bar Exams.