Ordinansa sa Labangon subay sa kampanya vs. dengue gitun-an

Gitun-an na sa Committee on Laws sa konseho sa siyudad sa Sugbu ang ordinansa sa barangay Labangon nga magsilot niadtong mga molupyo nga dili manglimpyo sa ilang palibot.

Kung walay aksyon nga himuon ang City Council niini human sa 30 ka adlaw, mahimo nang ipatuman sa barangay ang nahisgutang ordinansa.

Matud ni Labangon Barangay  Captain Felix Abella nga ang ilang gipanday nga ordinansa maoy kabahin sa ilang Anti-Dengue Campaign.

Kini human usab nahimong numero uno ang nahisgutang barangay sa mga kaso sa dengue gikan sa 80 ka mga barangay sa dakbayan sa miaging tuig.

Sa kasamtangan, ang barangay Labangon nahimutang gihapon sa unang napulo ka mga barangay sa siyudad nga nag-una sa mga kaso sa dengue.

Kadtong mga molupyo nga masakpang wala manglimpyo sa ilang tugkaran, wala iyabo ang napundong tubig ug uban pa, pamultahon sa ordinansa ug P500.

Nagkanayon si kapitan Abella nga kadtong mga molupyo sa ilang barangay nga walay ikabayad, ilang paserbisyuhon sa ilang komunidad.

Kini sama sa paglimpyo sa ilang barangay hall, karsada, sports complex, merkado, lakip na sa ilang sam-ang sa Labangon.

Una nang gihangop sa Department of Health (DOH) ang pagpanday sa nahisgutang ordinansa, sa pagtoo nga kini dako og matabang sa ilang Anti-Dengue Drive.

Lakip sa nihangop niini mao si Mayor Tomas  Osmeña, tungod usab sa iyang pagtuo nga mapugos na ang mga molupyo sa pagpanglimpyo.

Sa susamang kalambuan, ang chairman sa Cebu City Disaster Coordinating Council (CCDCC) nga si Konsehal Gerardo Carillo nagplano usab pagpanday og susamang proposal.

Kini tungod kay alang sa konsehal, ang kanunay lang nga pagpanglimpyo maoy epektibong paagi pagsumpo sa sakit nga dengue.

Sa labing awahing talaan sa CCDCC ang dakbayan duna nay 440 ka dengue cases sukad sa buwan sa Enero ug 15 na ang namatay.

Kini mas taas itandi sa unang tulo ka buwan sa miaging tuig nga duna lay 206 ka kaso ug duha lang usab ang nakalas sa nahisgutang sakit.