4-anyos napaig sa sunog

Usa ka kuwatro anyos nga batang babaye nga biktima sa polio ang napaig pagkasunog sa ilang balay sa sitio Danao barangay Lower Becerril bukirang bahin sa lungsod sa Boljoon niadtong Biyernes sa alas 9:30 sa buntag.

Giila ni PO3 Simplicio Flores sa Boljoon Police Station dihang nahinabi sa Banat News ang namatay mao si Melissa Garganta.

Si SFO1 Julde Deposa fire marshal sa Boljoon dihang nahinabi sa Banat News mitug-an nga nagduwa og kalayo ang 5-anyos nga magulang babaye sa biktima nga maoy gibinlang mobantay sa balay.

Duha sa mga maguwang sa mga bata nangiskuyla samtang ang ilang inahan nga si Elena naglabada sa silingang gibana-banang tunga sa kilometro ang gilay-on gikan sa ilang balay.

Matod ni SFO1 Deposa sa tantong duwa sa kalayo napasagdan kini niya ug wala mabantayi nga nikaylap sa tinapok nga pinaugang lukay sa lubi hinungdan nga nikatap ang sunog ug gilamoy ang balay.

Tungod kay ginama man kini sa gaay dali lang nidilaab ang sunog apan bugtong ang singko anyos ra ang nakagawas ug nahabilin ang bakol nga si Melissa hangtud sa pagkaugdaw sa ilang balay.

“Na-trapped ang bata sa sulod sa balay nga nasunog ang biktima hinungdan nga na-apil kini sa pagkasunog ug namatay,” asoy pa ni Deposa.

Na-recover sa kabomberohan ang paig nga patayng lawas sa biktima nga nasusama na sa giuling nga kahoy. Gikataho usab nga gawas nga polio victim kini malnourished usab kini dugang asoy ni SFO1 Deposa.

Gibana bana ni SF01 Deposa nga moabot lang og P12 mil pesos. Gikatahong bukid kaayo ug layo sa kuhaanan og tubig ang gihimutangan sa maong balay ibabaw sa bukit.