Drayber gitusak og bala patay

Natusak sa bala ang tibuok kalawasan sa usa ka habal habal drayber nga giatngan sa karsada ug gipusil patay sa wala pa matumbok nga mamumuno sa sitio Looc barangay Saavedra lungsod sa Moalboal niadtong Huwebes sa gabii.

Gibutyag ni SPO3 Teofilo Amodia Jr., sa Moalboal Police Station dihang nahinabi sa Banat News ang biktima mao si Romeo Grabantes, 28, naka-angkon og pito ka mga samad pinusilan sa lain laing bahin sa lawas hinungdan sa hinanali niining kamatayon.

Duha ka samad pinusilan ang na-angkon sa biktima sa sentro sa iyang bukobuko, laing upat ka samad pinusilan sa iyang wala nga abaga nga nilapos sa iyang aping ug usa ka samad pinusilan sa iyang batiis.

Ang biktima gikan nga namasahero ug paingon na untang mopauli kauban ang iyang live-in partner nga si Jannifie Recarte.

Matud ni SPO3 Amodia dihang hapit na sila moabot sa pinuy-anan niini namatikdan sa biktima nga nawala ang iyang yawe sa motor hinungdan nga nihunong kini ug gipahulat ang live-in partner aron pangita-on ang yawe sa motor nga gituohan niining nahulog sa dalan.

Gitug-an ni Recarte nga sa paglabay sa pipila ka minutos nabati niya ang mga buto buto sa armas ug wala magdugay dunay nagpahibalo niya nga ang iyang live-in partner ang gipusil ug namatay.

Sa pagresponde sa kapulisan na-abtan nalang niini nga nag-ubo na sa kalsada ang biktima nga wala nay kinabuhi ug narekober gikan sa crime scene ang pito ka basiyo sa bala sa kalibre .45 ug tulo ka mga deformed slug niini.

Dugang nahipos nga kasayuran gikan sa kapulisan sa Balamban nga ang biktima duna kiniy pending kasong giatubang sa korte may labot sa ginadiling drugas apan temporaryong gawasnon human makabutang og piyansa.