80 ka tinun-an ang nahatagan og scholarship

Mikabat sa 80 ka mga tinun-an sa kolehiyo ang nakadawat og ayuda gikan sa scholarship program ni Cebu 6th District Cong. Nerissa Soon Ruiz didto sa barangay Basak dakbayan sa Lapulapu kagahapon sa buntag.

Sa maong kalihukan personal nga gitunol ni Under Secretary Joselito Ruiz ang kapikas ni Rep. Nerissa diin 80 ka mga tinun-an ang nakadawat og 5 mil ka pesos alang sa ilang pagtungha ning tuiga.

Gipasabot ni Ruiz nga dugay na nila kining gihimo sa dihang provincial board member pa si Inday Neri ug hangtod karon nagpadayon kini samtang anaa pa kini sa pwesto isip inahan sa siksto distrito gumikan kay gahin kini gikan sa iyang educational development fund.

Matod pa ni Ruiz ang mga tinun-an nga nahatagan sa maong benipisyo walay grado nga ilang gipamentinar kundi ang pagtiwas gyud sa ilang pagtungha ug makapasar kini sa ilang kurso nga gikuha sa kolehiyo.

Sa pagka karon adunay dul-an sa 2 mil ka mga tinun-an ang ilang nahatagan sa maong ayuda niining tuiga diin ang matag usa kanila nagdawat 5 mil ka pesos sa matag tuig.

Gumikan niini ang magtiayong Alejandro ug Florenda Abatayo dako ang ilang kalipay sa maong ayuda nga gihatag ni Cong. Ruiz nga inabagan ni Usec. Ruiz gumikan kay makabayad na sila og down payment sa tuition sa ilang mga anak alang sa laing semester sa ilang pagtungha.