Mga Amerikano nagsukmagay

Duha ka mga Amerkanong hubog ang nagsukmagay sulod sa usa ka imnanan diha sa dalan Nellas sa barangay Poblacion 3 dakbayan sa Carcar niadtong Huwebes sa gabii.

Parehong nangabun-og ang langyaw nga sila si Sam Watkins, 63, residente sa sitio Tawag, barangay Villadolid ug Bobby Fowler, 70, buwag sa asawa ug nagpuyo sa Palm Pension House sa barangay Poblacion I, human sila magsinukliay og kinumo.

Nasuta nga nasuko si Watkins kang Fowler human kini mainsulto sa gibuhiang estorya sa naulahi kabahin sa mga babayeng Filipina.

Nasuta nga ang El Rancho restaurant giingong gipanag-iya ni Watkins maoy giimnan sa grupo ni Fowler ug ubang mga langyaw, si Watkins nag-inom usab niadtong tungura.

Sa imbestigasyon sa kapolisan gikatahong nagsige og panabi si Fowler nga iya na tanang nakarelasyon ang tanang mga empleyada ni Watkins.

Si Watkins pagkadungog niini mibadlong kang Fowler nga di magpasiatab og estorya aron dili makasugamak og gubot apan wala kini mopatuo ug mipadayon sa iyang pagtabi hinungdan nga niresulta kini sa ilang mainitong panagbangi.

Si Watkins maoy gikatahong niuna og sukmag kang Fowler nga nisangpot na sa ilang sinumbagay, si Fowler nabun-og sa ilong, walang bukton ug ubang parte sa lawas ingon man si Watkins.

Ang karambola sa duha nakaingon sa pagkatibulaag sa ubang mga kustomer ug mga langyaw, apan wala kini dayon mapakgang ug miabot sa gawas hangtud sa dalan nga nakaingon nga nabalda og gamay ang trapiko.

Ang mga mirespondeng tanod na maoy niukang sa duha ug gidali og dala si Fowler sa Carcar City District Hospital.

Wala pa matino kung dunay mopasaka og kaso sa usa’g-usa samtang gitun-an usab sa kapolisan kung unsang kaso ilang masang-at sa duha.