"Masakiton" gitusak dunggab tipi

Wala na matabang sa mga mananambal sa Cebu City Medical Center ang usa ka 64-anyos nga lalaki human kini dunggaba sa iyang silingan niadtong Huwebes sa hapon diha sa Flores St., Mahayahay 2 barangay Pasil ning dakbayan.

Giila ni SPO2 Jay Yballe sa Homicide Section ang biktima mao si Bairulla Basanon kinsa nakaangkon og samad dinunggaban sa dughan ug sa ubang parte sa lawas.

Arestado usab ang suspek nga si Gregorio Labrador alyas “Gorio” hingkod ang panuigon walay trabaho. Si Labrador maoy gikatahong gikabangi kaniadto ni Pasil barangay captain Romeo Ocarol nga iyang gipasalbahan diha sa basketbolan ug naigo sa splinter sa bala dili palang dugay.

Ang biktima gikatahong naglingkod ra diha gawas sa usa ka tindahan niadtong tungura dihang kalit nga giduol sa suspek ug walay daghang pangutana gidunggab kini makadaghang higayon.

Matud pang Yballe base sa gitug-an sa asawa sa biktima nga si Dorie Pita Basanon, dunay sakit sa likod ang iyang bana ug maglisod kini sa paglihok-lihok.

Daling mieskapo ang suspek human sa hitabo apan nadakpan kini gihapon sa mga polis ug mga nangitang mga barangay tanod human sa tulo ka oras gikan sa pagkahitabo.

Ang biktima daling gidala sa CCMC apan nakabsan kini sa kinabuhi pasado alas 3 sa hapon.