Dul-an sa P200 mil balor sa gituohang shabu ang nasakmit sa Criminal Investigation and Intelligence Branch (CIIB) sa barangay Tejero ning dakbayan.
Kini human ang CIIB pinanguluhan mismo sa ilang hepe Sr. Insp. George Ylanan ang nipahigayon og checkpoint sa nahisgutang dapit ug naatlan ang duha ka mga suspetsado nga nagsakay og kolor blue Yamaha nga motorsiklo.
Ang mga suspetsado nga gi-presentar kagahapon sa buhatan ni CCPO Chief Patrocinio Comendador, giila nga sila si Margarito Devalucas, 26, taga Iligan City ug kasamtangan nagpuyo sa usa ka apartment diha sa dalan Bonifacio, Parian, ug Geovani Dayagdag Balucan, 36, taga Iligan City negosyante og RTW nga ibaligya sa Tanjay, Negros ug kasamtangang nagpuyo sa barangay Sambag 2 ning dakbayan.
Ang duha nadakpan human sila milikay unta sa checkpoint diin pito ka mga medium packs nga gituuhang shabu ang nakuha sa kapulisan sa tuong bulsa sa cargo pants ni Debalucas.
Ang driver nga si Balucan nga gikahinabi sa Banat News niingon nga nisuway sila og eskapo gumikan kay iyang motorsiklo wala pay rehistro.
Ang duha gitanggong pa karon sa karsel sa CCPO samtang gihikay pa ang tukmang kasong ipasaka batok sa mga akusado.