NFA-7 official ipatawag sa hunta

Nagkasabot ang mga sakop sa Hunta probinsyal sa Sugbu nga sa sunod sesyon karong Lunes ilang paatubangon ang Regional Manager sa National Food Authority (NFA) Cebu nga si Ramon Astilla.

Si Bokal Willie Caminero sa ikaduhang distrito ug chairman sa Committee on Agriculture sa Hunta probinsyal miumol og usa ka resolusyon nga nag-awhag ni Astilla nga moatubang sa mga sakop sa Hunta probinsyal.

Kini aron ipahibalo sa mga sakop sa Provincial Board kung unsa nay sitwasyon karon sa NFA.

Gusto sa mga sakop sa Hunta probinsyal nga masayran gikan kang Astilla kung daghan pa bang stock sa NFA rice ang NFA-7.

Samtang awhagon sa Hunta probinsyal ang mga lokal nga kagamhanan nga motabang pagpasabot sa publiko kabahin sa pagdaginot sa bugas.

Kini aron dili kaayo ma-apektuhan sa gikataho nga krisis sa bugas nga giingong niigo dinhi sa Central Visayas.

Nunot niini, mopalabang usab og resolusyon si Bokal Juan Bolo nga mag-awhag sa lokal nga kagamhanan sa pagpasabot sa publiko nga magdaginot ug insakto lang ang gamiton nga konsumo sa bugas.

Naalarma ang board member sa report nga dunay 30 porsiyento sa bugas matag adlaw ang dili makaon ug malabay lang ilabi na sa nagkalain-laing restaurant.

Gisukip sa maong resolusyon sa bokal ang subsob nga monitoring sa mga kamerkadohan aron masiguro nga magpabilin ang supply sa bugas sa tibuok rehiyon siyete.