Lawas sa 30-anyos nabulit sa bala

Usa ka 30 anyos nga lalaki ang nabulit sa bala ang tibuok lawas human kini gipareglahan ug gipusil sa gikatahapang mga sakop sa Crips Gang niadtong milabay'ng gabii diha sa Sitio Bayong, barangay Tisa ning dakbayan.

Ang biktima nga si Christobelle Avenido, ulitawo ug walay trabaho ug nagpuyo sa nahisgutang lugar, patay na nga nahidangat sa Cebu City Medical Center (CCMC).

Samtang ang mga suspetsado giila nga sila si Marlon Osorno, 23, ulitawo, silingan sa biktima, Joseph Padin ug usa ka ginganlan og “Gesto”.

Ang ka live-in partner sa biktima nga si Irene Ruiz, 30, mitug-an sa mga imbestigador sa Homicide Section pinaagi nila ni SPO1 Rogelio Nedamo ug mga kaubanan nga ang biktima naglakaw kini paingon sa usa ka tindahan nga dili layo sa ilang panimalay ug kalit lang gipahunong ug gi-agda sa pag-inom.

Matud pa niini dihang mibalibad ang biktima, si Padin maoy mipatid niini ingon man misukmag ug sa dihang nahagba gibunalan ang ulo niini og botelya sa suspetsadong ginganlan og "Gesto."

Human sa pagbunal, si Osorno mipusil sa biktima makadaghang higayon sa lawas niini nga maoy hinungdan sa kamatayon ug gideklarar sa mga doktor nga dead on arrival.

Ang mga suspetsado human sa hitabo dali kaayong misibat palayo sa maong lugar dihang unang miresponde si PO3 Jeffrey Diola sa TRS ug sa mga sakop sa Police Station 10.