Afrena-7 miduso ni Villarin mangulo sa anti-smuggling

Ang Association of Former Regional Executives of National Agencies sa rehiyon (AFRENA 7) miduso kang kanhi National Bureau of Investigation-7 director, Florencio Villarin nga maoy mangulo sa giplanong tukoron ni Presidente Gloria Macapagal Arroyo nga 'anti-smuggling watchdog' sa nasud.

Gitumong ang maong grupo aron mabantayan ang mga ahensiya sa gobiyerno nga maoy tinubdan sa pundo ug kita sa buhis sama sa Bureau of Customs ug Bureau of Internal Revenue nga karon gidudahang nalambigit na sa kahiwian.

Ang presidente sa AFRENA 7 David “Boy” Odilao, Jr., kanhi Cebu district collector sa Customs nasagmuyo tungod kay bisan sa daghang mga yunit nga nag-operate diha sa adwana wala gihapon kini makatabang sa sitwasyon.

Mas misamot pa hinuon ang giingong pagpangawkaw sa mga abusadong mga negosyante nga namuhunan na diha sa maong mga ahensya.

Ning bag-ohay lang ang AFRENA-7 milagda og Memorandum of Agreement sa Ombudsman ug gitudlo ang grupo ni Odilao isip usa sa mga Corruption Prevention Unit sa maong buhatan aron makatabang sa gobiyerno sa pagbuntog sa korupsyon.

Samtang giawhag sa grupo nga wagtangon dayon ang naumol nga mga yunit kontra smuggling nga nagsalig lang sa ‘swerte’ ang performance kun mahulma na ang grupong gisugyot ni Arroyo.

Masaligon ang AFRENA-7 nga sa kapasidad ug pagka-eksperto ni Villarin sa natad sa intelligence, investigation ug prosecution dako kini og matabang kontra korupsyon subay usab sa gitinguhang makab-ot sa administrasyon. (Princess Mondejar ug Queenie Chariz Dayanan)