Tulo sa mga drug suspects nasikop sa kapolisan sa Lapulapu atol sa buybust operation nga gipahigayon sa Sitio Sta. Maria Barangay Pusok dakbayan sa Lapulapu sa milabay'ng hapon.
Ang nasikop mao si Eusebio Bagiuo Jr. alyas Bimbo, 35 ; Jeofel Berdon Berdin alyas Joefy, 18, pulos nagpuyo sa sitio Kinalumsan barangay Gun-ob ug Lindelisar Blanco Paquibot alyas Lendel, 21, residente sa sitio Bagumbayan, barangay Maribago dakbayan sa Lapulapu.
Ang buybust operation gipangulohan ni SPO3 Mario Poblete uban sa mga sakop sa PDEA 7 ug sa mga sakop sa composite team sa kapolisan sa Lapulapu.
Si Bagiuo human sa binayranay tali kaniya ug sa decoy nakabantay ug midagan apan nasakpan kini diha sa iyang balay diin usab naaktuhan sila si Berdin ug Paquibot nga nanuyop og shabu.
Atol sa pagrekisa kang Bagiuo nakuha sa iyang posesyon ang usa ka medium nga pakete (bulto) sa gituhuang shabu diin mitimbang og 4 gramos, ug 36 ka gagmay paketeng may sulod nga gituhuang shabu, cash nga 1,800 ka pesos nga gituhuang halin sa pagpamaligya sa shabu ug ang marked money nga P200.
Gikatahong sila si Berdin ug Paquibot maoy mga runner ni Bagiuo sa shabu nakuhaan usab og mga ebidensiya sa ilang posesyon. Napulo ka pakete ang kang Berdin ug duha ka pakete lakip na mga drug paraphernalia usab ang kang Paquibot.
Nasuta usab nga si Bagiuo dunay pending warrant of arrest sa kasong paghupot og illegal nga drugas nga giluwatan ni RTC Branch 27 Hon. Judge Toribio Quiwag.