Pasangil nga gi-torture ang gang man gihimakak

Kusganong gihimakak sa kapolisan ang pasangil sa mga suspek sa pagtulis ug pagpatay sa usa ka tinun-an sa nursing nga sila gi-torture sa kapolisan aron ipaangkon ang krimen.

Ang namasangil nga gi-torture mao si Mark Anthony Gabriel Labitad kinsa usa sa tulo ka suspek sa pagtulis-patay kang Ruby Jade Ruba diha sa dalan Gov. Roa sa barangay Capitol Site.

Si Labitad, ug Ivan Marabat pulos miangkong mga sakop sa Crips Gang una nang miangkon sa salaod gawas lang kang Carl Marx Carticiano nga maoy ilang gitumbok nga tag-iya ug maoy nagmaneho sa motor dihang ilang gitulis ug napatay si Ruba.

Atol sa gihimong arraignment kagahapon sa korte sa maong kaso si Gabriel mitug-an sa mga sakop sa media nga gibun-og sila aron angkunon ang salaod apan gibakwi niini ang nahaunang pangangkon.

Si Sr. Insp. George Ylanan, hepe sa Criminal Investigation and Intelligence Branch ug maoy nangulo sa Task Force Ruby Jade mitug-an sa mga tigbalita nga wala sila magsalig sa “extra-judicial” confession sa mga suspek.

Matud pa nila nga ang lig-on nilang ebidensya mao ang pamahayag sa mga testigos nga positibong miila kanila nga mao ang mga tawong mipatay kang Ruba kinsa gikatakda untang mopaso sa kursong nursing karong Marso 30.

Samtang si Sr. Supt. Patrocinio Comendador, director sa CCPO mitug-an nga sagad na gyud nga depensa sa mga suspek nga madakpan ang pagbakwi sa nahauna nilang pag-angkon sa sala apan dako ang iyang pagtuong ang mga ebidensya ug testimonya sa mga testigos maoy makapalig-on sa kaso.