Polis nagmaoy nanion

Usa ka polis nga giingong hubog ang nanion sa armas ngadto sa iyang mga silingan sa sitio Suba sa barangay Poblacion sa lungsod sa Liloan gidakop ug gibalhog sa bilanggoan.

Ang suspetsado mao si PO1 Ademar Salvia, 39, nga nadestino sa Bohol Provincial Police Office (BPPO) ug nagpuyo sa maong dapit.

Ang gipanionan nga mga silingan mao sila si Mark Tagalog Sabellano, 30 ug Andy Boy Tagalog Yuson.

Si PO3 Ricardo Enriquez nga nahinabi sa Banat News miingon nga hubog na nga nahiuli sa maong dapit si Salvia ug miibot sa iyang gitakin nga kalibre 45 ug nagpahibalo nga mopaboto.

Dugang pa niya nga gibadlong sa mga silingan si Salvia sa dili pagpaboto sa armas apan gikasuko niya kini ug gipanionan ang duha nga si Sabellano ug Yuson diha sulod sa ilang balay.

Nangayo'g panabang ang mga lumolupyo sa maong lugar sa kapolisan sa maong lungsod ug ilang gidakop si PO1 Salvia nga maoy nakaingon sa pagkabalhog niini sa bilanggoan.