Bayan mosusi sa mga selda

Ang mga sakop sa militanting pundok dinhi sa Sugbu mosuhid unya sa tanang mga police station dinhi sa dakbayan aron paglantaw sa kahimtang sa mga piniriso nga kasamtangang gipangtanggong gumikan sa nagkadaiyang kaso.

Si Arman Perez, secretary general sa Bayan Muna Central Visayas nga gikahinabi sa Banat News nagkanayon nga makig-coordinate sila kang Cebu City Police chief Patrocinio Comendador aron malantaw ang kahimtang sa mga piniriso.

Matud pa niini nga ilang paninguhaon nga uban sa mga opisyal sa kapolisan sa dakbayan sa Sugbu ingon man sa pagpakig-alayon sa mga pribadong sektor malantaw ang kahimtang sa mga selda sa matag police station sa ingon kadtong mga wala pa mahukmi o mga suspetsado pa lang sa krimen dili usab masakit samtang gitanggong gumikan sa dili maayo nga kondisyon sa selda.

Sumala pa niini nga ilang paningkamutan nga makatabang usab niadtong mga piniriso pinaagi sa pakig-alayon sa kapolisan ug mga pribadong sektor nga ma-upgrade ang mga detention cell sa ingon dili usab luoy ang mga piniriso bisan tuod ang uban niini nakasala apan angayan gihapon lantawon ang ilang panglawas.