P1.50 umento gipangayo sa NADSU

Subling iduso sa mga sakop sa Nagkahiusang Drayber sa Sugbu ang P1.50 nga usbaw sa kasamtangang minimum nga pletihan nga niadto pang tuig 2004 nila gipangayo apan hangtud karon wala gihapon mapatuman bisan sa nagkataas nga presyo sa lana karon.

Si Nadsu president Ruben Rama sa pakighinabi kagahapon miklaro nga ang P1.50 nga ilang gipangayo dili matawag nga usbaw kundili igo ra nilang makuha og balik ang kung unsay maila unta niadto pang 2004.

Gibasol nila nga pag-regionalized sa paagi pagtakda sa pletihan tungod kay sa kaulohan napatuman gyud ang P7.50 nga minimum nga pletihan samtang dinhi sa Kabisay-an wala.

Niadtong 2004 nangayo ang NADSU og usbaw nga P.50 sa minimum fare sa unang upat ka kilometro apan wala kini sunda ug gihimo pa hinuon kining P5.00 bunga usab sa daghang petisyon sa nagkadaiyang sektor.

Nianang pagkasunod tuig miisyu si kanhi Land Transportation Office-7 Rogelio Osmeña og sertipikasyon nga nagmandong “piso ra ang umento” gikan sa P5.00 ngadto na sa P6.00 isip minimum ug mas gipatas-an pa ang kilometro gikan sa upat ka kilometro ngadto na sa lima.

“Kining among gipangayo isip lang ni pagbawi sa nawagtang sa amo since 2004,” sumala pa ni Roy Opura, ang chairman sa Nadsu sa Norte.

Matud pang Opura nga sa pagkakaron wala pay abiso gikan sa Piston sa Manila diin nasakop ang Nadsu kung mangayo na usab sila og increase tungod niining bag-ong pagsaka sa presyo sa lana.

Nanghangyo ang Nadsu sa publiko nga sabton ang ilang yangungo kabahin sa P1.50 sanglit sa tibuok nasud gikatahong ang Sugbu ug Bacolod lang ang pabiling P6.00 ang pletihan samtang ang Mindanao nga layo na kaayo ug mas lisod ang pangabuhian naningil na og P7.50 sama sa kaulohan.

Gibasol sa Nadsu ang RA 8479 kon Oil Deregulation Law tungod kay wala nay kontrol ang pagpasaka sa presyo sa mga kompanya sa lana human ma-privatized ang industriya sa lana dinhi sa nasud.