Cardinal mag-ampo sa kaayuhan ni Cory

Si Arsobispo Ricardo Cardinal Vidal mogahin og pag-ampo alang sa kaayohan sa sakit nga “colon cancer” ni kanhi Presidente Corazon Aquino, matud pa ni Msgr. Achilles Dakay, liaison officer sa archdiocese sa Sugbo.

Miingon si Dakay nga angay usab nga kining pag-ampo sa cardinal duyogan sa tanang Sugboanon kinsa nasayod sa kabayanihon nga nahimo sa kanhi pamuno nasud kinsa nanguna sa rebolusyon sa Edsa niadtong l986 nga misangpot sa pagkatumba sa diktadoriyang administrasyon ni kanhi Presidente Ferdinand Marcos.

Ang mga pag-ampo ipahinungod sa kaayohan sa sakit nga kanser sa dakong tinai o colon cancer nga giantos karon ni kanhi Presidente Aquino.

Matud sa tigpamaba sa Artsidyosesis sa Sugbo nga usa sa mga butang nga i-ampo sa Cardinal ug sa mga Sugboanon mao nga lamdagan unta ang mga doktor nga mo-opera sa kanhi Presidente nga matultolan ang hingpit nga paagi aron matambalan ug mamaayo ang iyang balatian.

Si kanhi Presidente Aquino usa sa nanguna sa mga katawhan sa tibook nasud sa pagbadlong sa iyang nalantawang kahiwian nga nahimo sa ubang mga opisyal sa administrasyon karon ilabi na sa isyu nga may labot sa ZTE-NBN deal.

Gipahibawo ang tibook nasud sa iyang sakit dihang gibutyag kini mismo sa iyang anak nga artista nga si Kris Aquino pinaagi sa programa niya sa telebisyon ug gikonpirmar usab sa laing anak sa kanhi presidente nga si Senador Benigno Noynoy Aquino III.