Negosyante, anak gitulis sa Mandaue

Usa ka negosyanteng babaye ug  anak niining lalaki nga naaberiya ang  van type nilang sakyanan sa reclamation area sa Subangdaku, dakbayan sa Mandaue ang gitulis sa miaging gabii sa tulo ka armadong lalaki nga nagsakay og motorsiklo.

Ang gitulis mao sila si Rowena Relampagos, 38, ug anak niyang lalaki nga si Ariel Relampagos, 17, nga mga lumolupyo sa barangay Nangka sa lungsod sa Consolacion.

Si PO3 Remegio Arciaga nga nahinabi sa Banat News miingon nga mokabat sa P30,000 nga salapi ug mga alahas ang nasakiyo sa mga tulisan kinsa dali usab nga nakapahilayo sa maong lugar.

Matud pa niya nga gikan pa sa ilang pagpangompra og mga dry goods sa dakbayan sa Sugbo ang mga biktima dihang naaberiyahan sa ilang sakyanan.

Gisusi sa inahan ug anak ang makina sa ilang sakyanan apan ang tulo ka wala hiilhing mga lalaki nga nahiagi sa maong dapit nga nagsakay og motorsiklo ang kalit lang nga mihunong ug nanganaug bitbit ang mga armas ug mideklarar og tulis.

Gibira sa tulisan ang shoulder bag  nga gisudlan sa salapi nga P30,000, mga alahas ug duha nila ka cellphone apan gipugngan unta kini ni Ariel nga maoy hinungdan nga gihulga kining pusilon kon magdumili sa paghatag.

Dali nga nakasakay ang mga tulisan sa giluwanan nilang motorsiklo ug mipabulhot sa pagpadagan paingon sa 1st  Mactan Mandaue Bridge sa dakbayan sa Lapulapu.