Nabuskag ang nawong sa usa ka konduktor human kini gi-shotgun sa usa ka security guard tungod sa giingong pagpanghagit niini sa suspek og sukmagay dihang gibadlong nga dili magsaba-saba sa ilang pag-inom sa barangay Cantao-an siyudad sa Naga niadtong Huwebes sa alas 11:45 sa kagabhion.
Ang biktima nga dead on arrival (DOA) paghiabot sa South General Hospital giila sa kapulisan nga usa ka Marlon Maramar, minyo ug molupyo sa nahisgutang lugar.
Samtang ang suspek mao ang usa ka Danilo Aranas Gako, 29, usa ka security guard nga sakop sa Assault Security Agency nga nagbase sa San Roque siyudad sa Talisay apan kasamtangang nadestino sa Kyocera Kensike Philippines Inc. nga nagbase sa barangay Cantao-an, Naga City.
Matod ni PO1 Ken Cabrera sa Naga City Police Station dihang nahinabi sa Banat News ang biktima kauban sa iyang mga higala nag-inom sa gawas nga bahin sa koral sa kompaniya nga gibantayan sa suspek.
Apan niduol ang maong gwardiya ug gibadlong ang biktima ug mga kauban niini nga pahinayan ang tingog.Apan matod pa nasuko ang biktima ug gihagit niini og sukmagay ang gwardiya hinungdan nga gipusil niini ang biktima ginamit ang shotgun nga iyang gibitbit.
Ang biktima naka-angkon og samad pinusilan sa walang bahin sa nawong ug gidali pagdala sa tambalanan apan gideklarar kini sa mga doktor nga DOA.
Samtang ang suspek boluntaryong mitahan sa iyang kaugalingon sa kapulisan dungan ang pag-turn over sa shotgun ug mga bala niini.