Pet-owners pamultahon kun....

Sugod karong sunod buwan, dili na sayon sa mga pet owners ang pagbuhi og mga iro dinhi sa dakbayan sa Sugbu tungod kay gikinahanglan na nga iparehistro ang tanang mga iro sa siyudad kun dili buot mag-atubang og bug-at nga multa ug silot.

Matud ni City Veterinarian Doctor Alice Utlang nga ila nang hingpit ipatuman dinhi sa dakbayan ang Akta Republika 9482 kon ang Anti-Rabbies Act of 2007.

Base sa nahisgutang balaud, kadtong mga pet owners nga mapakyas pagparehistro sa ilang binuhi nga iro mahimong pamultahan og P2 mil.

Laing P500 usab ang multa sa mga tag-iya kung ang ilang iro niuban nila wala higti ug libre nga nakasuroy-suroy sa dalan.

Mahimo usab nga mamultahan og P25 mil kadtong mga pet owner kansang iro makapaak og tawo nga dili moangkon og responsibilidad.

Nagkanayon si Doctor Utlang nga mahimo usab nga mabilanggo ang mga tag-iya og mga iro kung walay ikabayad nga multa ubos sa nahisgutang balaud.

“Naa man sa bag-ong balaud nga kung dili makabayad ang tag-iya sa multa, mahimong pasakaan og kaso ug mapriso gyud sila,” sumala ni Utlang.

Gipahibawo sa City Veterinarian nga nahulma na ang iyang team nga maoy mosuroy sa kabarangayan sunod buwan aron pagmonitor sa mga iro.

Niingon si Utlang nga ang pagpatuman sa Anti-Rabies Act of 2007, maoy kabahin sa ilang target paghimo sa siyudad nga rabies-free unya sa tuig 2010.

Gawas sa pag-implimentar sa nahisgutang balaud nagkanayon ang City Veterinarian nga nagpadayon gihapon ang uban nilang mga programa batok sa rabies.

Kini sama sa pagpamakuna, pagpangapon ug labaw sa tanan, ang paghipos sa libudsuroy nga mga iro diha sa kadalanan.

Matud ni Doctor Utlang nga sa niaging tuig, ang siyudad nakahipos og kapin sa 7 mil ka libudsuroy nga mga iro diin kadaghanan niini ilang gipamatay.