Nakabsan gyud sa iyang kinabuhi sulod sa pribadong tambalanan ang usa ka construction worker human kini giunay sa pagdunggab sa iyang kaubang construction worker mga alas 4:14 sa kaadlawon kagahapon diha sa sulod nga bahin sa Sky View Park, barangay Busay ning dakbayan.
Sa report sa Homicide Section sa Cebu City Police Office ang biktima giila nga si Baldomero Makabenta, laborer sa Primary Construction, stay-in worker ug lumad nga taga barangay Awihaw, dakbayan sa Toledo.
Ang biktima nabulit og samad dinunggaban sa lawas human kini dunggaba ginamit ang usa ka 6 ¾ pulgadas nga gitas-on sa improvised nga tinalinisang puthaw sa suspetsadong si Garry Pedere, 25, kaubang construction workers ug silingan sa biktima sa dakbayan sa Toledo.
Base sa imbestigasyon nila ni SPO1 Henry Orbiso ug mga kaubanan sa Homicide Section, ang biktima gikatahong natulog na niadtong higayuna sulod sa usa ka payag-payag dihang gisulod ug gidunggab sa suspek.