P1.5M danyos sa sunog sa Carcar

Mokabat sa P1.5 milyones  ang kinatibuk-ang danyos sa sunog nga miigo didto sa Dr. Jose Rizal Street, barangay Poblacion-II siyudad sa Carcar niadtong milabay’ng hapon.

Upat ka mga panimalay ang gihurot og lamoy sa kalayo nga gipanag-iya nila ni Felix Bargayo, Dr. Sergio Enriquez Sr.,  Mamerta Ybañez ug Atty. Davita Alfafara.

Samtang ang usa ka panimalay nga  nakan-an sa kalayo gipanag-iya sa usa ka Josie Benoya.

Gibutyag ni Insp. Roy Harry Abellanosa, fire marshal sa siyudad sa Carcar, nagsugod ang kalayo sa pinuy-anan ni Bargayo nga ig-agaw usab ni Gilbert Bargayo, ang naila na nga kanunay magpalansang sa krus sa matag semana santa.

Apil sa gilamoy sa kalayo ang mga appliances ug mga furniture sa maong mga panimalay.

Hinuon walay nakalas o naangol atol sa maong sunog gawas lang sa usa ka sakop sa kabomberohan sa San Fernando nga si FO1 Juden Opsima nga nakaangkon og paso sa iyang kamot.