4 ka radio station ikiha ni Greg

Si Bise Gobernador Gregorio Sanchez Jr. mibahad sa upat ka mga estasyonan sa radyo nga iyang pasakaan og kaso tungod sa pag-atake sa iyang pagkatawo niadtong miaging semana.

Ang komentaryo sa maong mga estasyonan nga wala hinuon ibutyag sa bise gobernador ang mga ngalan nahitabo sa dihang gidakop si Carlo Duga-duga, station manager sa Aksiyon Radyo, tungod sa kasong libelo nga iyang gisang-at batok sa komentaristang si kanhi Mayor Gilbert Wagas sa Compostela.

Gnai, gitug-an ni Atty. Oliveros Kintanar, abogado ni Sanchez, nga posibleng mosang-at sila og kaso batok sa maong mga sibyaanan sa dili madugay.

Gipasabot ni Sanchez nga usa ka harassment ngadto kaniya ang gibuhat sa mga brodkaster nga nagkomentaryo sa pagkadakop ni Duga-duga  gumikan kay mideretso kini og atake kaniya nga wala siya kuhai sa iyang side.

Sa laing bahin gitin-aw  ni Sanchez  nga wala maapektohi ang iyang produktong Lacto Pafi bisan pa og giayo kini pag-atake sa duha ka mga komentarista nga sila si Tony Avila ug  Wagas sa estasyonan sa radyo nga ilang gi-alagaran.

Apan gipasabot sa bise gobernador nga isip usa ka opisyal sa gobiyerno, mosugot siya og atakehon ang iyang pagkatawo basta duna kini basehanan sa iyang trabaho isip opisyal.

Apan dili lang gyud siya gusto nga atakehon ang iyang produkto nga Lacto Pafi ug uban pang produkto.

Miingon ang bise gobernador nga daghan na kaayong mi-testimonya nga nangaayo ang ilang sakit gumikan sa maong produkto. Gani usa na niini ang komentarista nga kusog na kaayong moatake karon.

Subli usab niyang gitin-aw nga iyang gireklamo ngadto sa mga opisyales sa Kapisanan ng mga Brodkaster sa Pilipinas (KBP) sa dihang giatake nila ni Wagas ug Avila ang maong produkto.

Gibutyag sa bise gobernador nga iya pa ganing gitawagan si Edward Abad, kanhi presidente sa KBP, kabahin sa pag-atake sa maong mga komentarista nga  dili accredited sa KBP.

Apan nagkanayon ang bise  gobernador nga wala tagda sa KBP ang iyang reklamo hinungdan nga misang-at siya og kasong libelo batok nilang Wagas ug Carlo Duga-duga, ang manager sa Aksyon Radyo.