Kap dismayado kay ordinansa wala tumana

Dismayado ang barangay kapitan sa Kasambagan ning dakbayan sa Sugbu nga si Jose Lim tungod sa ordinansa nga wala hingpit ipatuman.

Ang gipasabot ni Lim mao ang pag-ban sa mga ilimnong makahubog diha sa mga tindahan nga duol og mga tunghaan.

Matud ni Lim nga ubay-ubay sa mga sari-sari store luyo sa University of Cebu diha sa ilang barangay ang namaligya og ilimnong makahubog.

Gani ang mga tinun-an sa nahisgutang unibersidad giingong anha magyampungad sa dalan J. Panis ug ilang makit-an nga mag-inom.

Gawas niini, miingon si  Lim nga nahimo na usab nga tapukanan sa mga sakop og fraternity ang dalan J. Panis nga usahay giingong moresulta sa kagubot.

“Kay kana man gong J. Panis diha anha mag-estambay ang mga batan-on, mga tinun-an mag-inom, naay may ordinance bahin ana pero wala man ipatuman,” sumala sa kapitan.

“Ug buot huna-hunaon ba, dili gyud na sila katinda ug mga ilimnon kay duol kaayo sa eskwelahan pero ambot nganong naunsa na,” dugang pamahayag ni Lim.

Subay niini, ang barangay Kasambagan nipasar og usa ka resolusyon nga magmando sa mga tindahan sa J. Panis St., sa dili pagbaligya og mga ilimnong makahubog.

 Partikular na niini ngadto sa mga tinun-an o sa mga minor de edad nga anaa mag-estambay diha sa nahisgutang dapit.

Ang resolusyon sa Kasambagan gipadangat na ngadto sa konseho sa siyudad ug kini naapil na sa agenda nga tukion atol sa sesyon karong buntag.

Sa pikas bahin, gipadalhan na usab sa barangay og kopya sa resolusyon ang Mabolo Police Station alang sa himuon niining lakang.

Nagkanayon si Lim nga ila na usab nga gihatagan og kopya sa resolusyon ang mga tindahan diha sa dalan J. Panis alang sa ilang kasayuran.

Miingon ang kapitan nga dili na nila hatagan og barangay clearance ang mga tindahan nga masakpang dili motamod sa ilang resolusyon.