Nagsagol-sagol ang reaksyon sa mga tinun-an ug mga sektor nga nisuporta kang ZTE-National Broadband Network deal whistleblower Rodulfo “Jun” Lozada dinhi sa dakbayan kagahapon.
Apan pipila ka mga tinun-an ang nireklamong gipugos lang sila sa ilang mga professor ug magtutudlo aron tambungan ang forum diha sa University of San Carlos gymnasium.
Dunay usa ka tinun-ang nangutana ug nikwestyon ug negatibo batok ni Lozada ang gipugos og pagawas sa mga tigpaluyo sa whistleblower.
Samtang ang uban usab nalipay nga nakakita kaniya og nakapaminaw sa iyang mga pamahayag ug miawhag sa ubang dunay nasayrang kahiwian sa gobiyerno sa pagpagawas sa kamatuuran.
Si Lozada nagkanayon nga dako ang iyang pasalamat sa suportang nakita dinhi sa Sugbu. Si Lozada human miabot sa Mactan Cebu International Airport kagahapon sa buntag gialirungan dayon og mga madre.
Si Lozada mipadayag sa kasagmuyo tungod sa wala pagtugot ni Arsobispo Ricardo Cardinal Vidal nga kini misahan dinhi.
Nunot niini bisan ang Black and White Movement misaway sa kardinal pagtawag kaniya nga kongresistang nag-sotana, atol sa report sa TV Patrol kagahapon.
Kusganon hinoong mihimakak ang simbahan nga may kamanduang susama niini.