Tulisan kulatado

Nadakpan sa pagtinabangay sa mga estambay ug kapulisan ang usa ka tulisan nga nangulata sa usa ka babaye nga lending collector nga iyahang gi-atngan ug gitulis didto sa barangay Lower Calahuan lungsod sa Minglanilla.

Ang suspetsado nga nakaangkon og mga bun-og human gitabangan og kulata sa mga estambay giila sa kapulisan nga si Vic Enore Plarisan, 30, molupyo sa barangay Lahug  sa dakbayan sa Sugbu.

Samtang ang biktima naila nga si Murriel Lhea Murillo, 20, molupyo sa barangay Pooc siyudad sa Talisay ug collector sa  Dungganon MWTR Inc. Micro Finance nga nagbase  sa Tunghaan, Minglanilla.

Gibutyag sa hepe sa Minglanilla Police Station Sr. Insp. Romeo Santander dihang nahinabi sa Banat News nagpahigayun sila og  patrolya niadtong tungura dihang nakamatikod sila nga dunay  komosyon sa maong lugar.

Sa ilang paghiabot sa dapit nahibaw-an nila nga ang biktima  nga nangoleksyon sa  mga utangan  gisugat  sa suspek   ug gideretso og sukmag ang wala nga aping niini.

Natumba ang biktima ug gibunlot  sa suspek  ang bag niini nga maoy gisudlan sa iyang koleksyon nga P15 mil, passport, calculator ug resibo.

Apan tungod sa pagsinggit sa biktima gitabangan og kulata sa mga estambay ang tulisan ug nabawi ang mga kinawat.