...Seguridad ni Lozada andam na

Dunay ubay-ubay’ng mga polis ang itagana aron bantayan si ZTE-NBN whistleblower Rodulfo Lozada atol sa pag-anhi niini sa University of San Carlos-Main Campus karong Marso 17.

Si Sr. Supt. Patrocinio Comendador, hepe sa Cebu City Police Office mitug-an nga mobutang siya og static covert ug overt police details diha sa maong tunghaan.

Matud pa niini duna nay request ang USC ngadto kaniya kabahin sa mga polis nga mobantay apan dako ang iyang pagtuong dunay kaugalingong close-in security si Lozada nianang maong adlaw.

Si Comendador nagkanayon nga posibleng daghang mga tawo ang motambong sa maong speaking engagement ni Lozada aron maminaw sa ipamulong niini.

Si Lozada maoy kanhi presidente sa National Forest Corporation usa ka kompanyang gipanag-iya sa gobiyerno nga nalambigit sa paghimo sa kontrata tali sa China ug sa Pilipinas sa 329 milyones dolyares nga National Broadband Network deal project nga giingong gipaluyohan sa kapikas sa Pangulo nga si Miguel “Mike” Arroyo nga kusganon usab nga gipanghimakak sa Malacañang. Bisan paman sa mga report sa balitang nasudnon gikan sa kaulohan kabahin sa mga hulga sa kinabuhi ni Lozada, si Comendador sa level sa Cebu City nga bisitahon niini wala makadawat og report kabahin sa susamang mga hulga kang Lozada.

Daan nang mipadayag ang mayor sa dakbayan nga dili welcome dinhi si Lozada apan wala usab kini mopasabot nga dili nila paanhion ang maong whistleblower.

Matud pa ni Mayor Tomas Osmeña nga nasayod nang daan ang mga Sugbuanon kabahin sa mga kurapsyon apan wala usab kinahanglanang abugon pa si Lozada.

Si Lozada mihimo na og mga campus tours sa nagkadaiyang mga unibersidad ug tunghaan sa Luzon diin nakakuha kini og suporta gikan sa mga tinun-an.

Tungod sa maong kontrobersya nanawagan ang nagkadaiyang sektor sa pagpagawas sa kamatuuran apan sa simbahan pinaagi sa gamhanang Catholic Bishops Conference of the Philippines wala mopadayag og baruganan kabahin niini.

Wala usab sila mosakay sa mga panawagan sa pipila ka pundok sa pagpatangtang kang Presidente Gloria Macapagal Arroyo gikan sa pwesto tungod sa maong kontrobersya.