Lima ka estudyante ang nabiktima sa pagpanulis sa barangay Poblacion-Media, sa lungsod sa Argao niadtong Huwebes sa alas 10:00 sa gabii.
Si Senior Inspector Teodoro Manatad III, hepe sa Argao Police Station miila sa mga biktima nga sila si Marvic Piscadero, Conamian Nerves, Joemar Mamites, Rolly Tapere ug Christian Rubia, estudyante sa Cebu State College of Science and Technology, Argao Campus.
Miingon si Manatad nga nasakmit sa duha ka tawong tulisan ang mga cell phone ug mga alahas sa mga biktima nga nagkantidad og dili mominus, P10,000.
Ang mga biktima kauban sa lain pang lima ka mga kaubang estudyante diha sa daplin sa karsada duol sa ilang mga balay nagkalingaw og estorya dihang misakdap kanila ang usa ka motorsiklo nga gisakyan sa duha ka wala mailhing tawo.
Human kini moagi sa ilang tungod, mituyok ug mibalik dayong hunong sa gipundokan sa mga biktima.
Dihang gipangutana sa biktima ang backrider niini kun kinsay ilang gipangita, imbes motubag, milanit hinoon ang backrider sa .38 kalibre nga rebolber ug dayong tion kanila uban sa pagpahibawo nga tulis.
Gumikan sa kahadlok, wa kalihok ang mga biktima ug dihadiha ang backrider mimando sa mga biktima sa pagtangtang sa ilang mga pulseras , relo ug mga cell phone.