Presyo sa bugas sa merkado nimahal

Nisaka na ang presyo sa bugas sa kamerkaduhan sa dakbayan sa Sugbu sulod na sa pipila ka mga semana sumala pa ni   Erwin Goc-ong, ang bise presidente sa Grains Retailers Confederation kon Grecon sa amihanang distrito sa siyudad sa Sugbu.

Matud ni Goc-ong nga ang “ganador” nga mapalit sa sayong bahin niining tuiga og P1,300 matag sako, karon mokantidad na og P1,700.

Ang Sinandomeng nga mobalor lang og P1,250 ang sako kaniadto, karon gipamaligya na sa tag P1,400 ang sako sa mga tindahan.

Lakip sa nisaka ang presyo mao ang imported nga bugas gikan sa Vietnam nga kaniadto mapalit lang og P1,120 matag sako, kini mokantidad na karon og P1,380.

Samtang ang Thailand rice nga   kaniadto  P1,180 matag sako,  tag P1,430 na ang sako karon.

Niingon si Goc-ong nga ang bugas mais nga maoy daling mapalit sa kabus nga mga Sugbuanon lakip usab nga niumento ang presyo.

Kini mapalit na karon sa tag usa ka libo ang sako, nga gipamaligya ra sa niaging pipila ka mga semana sa tag P720 ang sako.

Matud ni Goc-ong nga una nang niumento ang presyo sa NFA rice, apan kini mapalit lang gihapon sa mga tindahan sa tag P18 matag kilo.

Nabalaka si Goc-ong nga dili na moubos ang presyo sa bugas kung padayong magnihit ang supply niini, kung walay himuong lakang ang gobyerno.

Kini tungod kay giingong dili malikayan ang pagsaka sa presyo sa baligya kung ang supply niini mugamay, basi usab sa “Law of Supply and Demand”

Sugyot ni Goc-ong sa kagamhanan ilabi na sa NFA, nga mopabaha og supply sa bugas sa kamerkaduhan ug sa nagkadaiyang mga rice retailers.

“Ang factor ani nga makapa-stabilize sa presyo mao ra gyud ang pagpabaha sa NFA ug supply sa bugas sa kamerkaduhan,”sumala ni Goc-ong.

Nagtuo si Goc-ong nga ang nangadaut nga ricefield didto sa Luzon ug ang nangaguba nga irrigation system sa Mindanao maoy nakatampo nga nihinay ang ani sa humay.