Giparelibuhan na ang mga duty personnel sa kapulisan sa lungsod sa Carmen nga napugahan og piniriso niadtong nilabay’ng Domingo sa gabii.
Ang hepe sa Carmen Police Station Insp. Carlos Reyes Jr., nibutyag nga gipatuman niya ang gamay’ng lahugay pending sa imbestigasyon nga iyang gihimo may labot sa maong panghitabo.
Sugod kagahapon ang jailer nga si PO1 Walter Quirol ug ang desk officer nga si SPO2 Simplicio Ibo, temporaryong gidistino sa merkado publiko sa maong lungsod.
Samtang ang mga na-assign nga polis sa maong lugar nga sila si SPO1 Jesus Hayson maoy kasamtangang desk officer ug si PO1 Ricky Linawagan maoy kasamtangang jailer.
Gipasabot ni Insp. Reyes nga gipatuman niya ang temporaryong lahugay pending sa imbistigasyon nga iyang gihimo pagtumbok kun kinsay dunay dakung tulobagon pagpuga sa piniriso nga si Gelacio Villanueva Jr., nag-atubang og kasong murder.
Gidugang ni Insp. Reyes gihatagan niya og 48 oras nga tagal ang mga duty personnel atol sa nahitabung pagpuga pagduso og mga katin-awan hangtud karun Lunes.
Matud ni Insp. Reyes ang tubag nila ni SPO1 Ibo og PO1 Quirol maoy iyang basihan pagduso og rekomendasyon ngadto sa hepe sa Cebu Police Provincial Office (CPPO) Sr. Supt. Carmelo Valmoria alang sa pagpahamtang og silot niini.
Nagpadayun ang manhunt operation sa kapulisan sa Carmen sa nakapuga nga piniriso nga si Villanueva.