Pito ka mangingihaw kumpirmadong “adik”

Kompirmado gyud nga tigamitan og ginadiling drugas ang pito ka mga mangingihaw diha sa Cebu City Modern Abattoir sumala pang City Veterinarian Doctor Alice Utlang, human usab niini madawat ang resulta sa gipahigayong confirmatory test.

Kahinumduman nga niadtong miaging Pebrero 26, kapin sa 150 ka mga butchers, helpers ug cleaners diha sa modernong ihawan ang gipaubos sa kinalit nga drug test.

Pito niini ang napositibo sa paggamit og ginadiling drugas, ug ang maong resulta gipaubos gilayon sa confirmatory drug test sa PNP Crime Laboratory.

Kagahapong adlawa nadawat ni Utlang ang resulta sa confirmatory drug test ug napamatud-an nga mga “adis-adis” gyud ang pito ka mga mangingihaw.

“Pagkadawat nako sa resulta sa confirmatory drug test, nihimo dayon ko og memorandum nga nagdili pa nila pagsulod sa ihawan,” sumala ni Utlang.

Giklaro hinoon sa City Veterinarian nga ang adis-adis nga mga butchers dili mga empleyado sa City Hall kun dili mga pribadong mga mangingihaw.