Sakop sa CIDG-7 na-entrap

Usa ka sakop sa Criminal Investigation and Detection Group-7 ang nadakpan sa mga sakop sa National Bureau of Investigation –7 human gikatahong nangilkil sa usa ka lalaki kagahapon diha sa usa ka fastfood chain sa usa ka  dakong tindahan sa North Reclamation Area sa dakbayan sa Mandaue.

Ang nadakpan giilang si SPO4 Reynaldo Matillano, sakop sa CIDG-7 intelligence section human giingong modawat sa marked money nga P15,000 nga giandam sa NBI-7 tungod sa reklamo sa usa ka Ronnie Hernani.

Si Hernani nadakpan niadtong Domingo diha sa Consolacion gumikan sa paghupot og .45 kalibreng pistola nga walay lisensya.

Si Hernani nga taga Consolacion mipasangil kang Matillano ug lima ka mga polis lakip na niini ang usa ka opisyal sa CIDG-7 nga gipangayoan dayon siya og P100,000, apan P70,000 ray naabot niya ug maoy natunol sa grupo bugti sa iyang kagawasan.

Nianang Martes gikatahong gipangayoan siya pag-usab ni Matillano og P20,000 aron giingong ipang-areglo sa piskalya sa kasong kalapasan niini sa RA 8294 kon illegal possession of firearms, apan P15,000 ray iyang nahatag ug ang P5,000 niana nang pagka-Miyerkules.

Apan pagkasunod adlaw, gikatahong nangayo na usab si Matillano og P50,000 aron daw ipabayad sa abogadong maoy molaban kaniya apan sa gihapon P15,000 ray naabot ni Hernani nga nahatag kang Matillano.

Kagahapon subling nangayo si Matillano kang Hernani og P15,000 aron daw gamiton sa paghikay sa lisensya sa armas niini aron usab maoy ipresentar nga dokumento ngadto sa korte aron maabswelto kini sa kaso.

Apan nagduda na si Hernani sa maong pagpangayo hinungdan nga nidangop kini sa National Bureau of Investigation hinungdan sa nahitabong entrapment operation.

Matud pa sa usa sa mga ahenteng wala mopahingalan, daghan silang nanguyog sa maong operasyon kagahapon tungod kay sa report unom ka mga polis ang nalambigit, apan si Matillano ra ug asawa niini maoy tua sa maong kan-anan.

Si Matillano kusganong mihimakak sa pasangil ug nagkanayon nga igo ra siyang mitabang kang Hernani aron makakuha og lisensya apan kabahin sa kaso niini wala na kini mahimo tungod kay duna may ebidensya.

Si NBI-7 deputy chief, Atty. Ernesto Macabare sa report sa Balitang Bisdak kagahapon mitug-an nga dunay koordinasyon ang maong operasyon sa bag-ong hepe sa CIDG-7.

Si CIDG-7 regional officer, Sr. Supt. Zoilo Lachica, Jr. sa pakighinabi sa Banat News mitug-an nga dismissal sa serbisyo ang silot kang Matillano kung kini mapamatud-an.

Si Lachica nagkanayon nga duna siya’y direktiba sa iyang mga sakop nga trabahuon ang angayang ilang trabahuon depende sa ilang sa assignments.

Kahinumduman nga si Matillano nahatagan og “Medalya ng Sugatang Magiting” niadtong milabay’ng 2006 human kini mapusili atol sa buybust operation sa Yati, Liloan. (Uban sa report ni  Fred Languido)