Maayong pagkabuslot sa ilong sa usa ka 20-anyos nga lalaki kinsa giingong sakop sa gang nga True Brown Style (TBS) human kini pusila sa sakop sa Crips kagahapon sa buntag diha sulod sa usa ka internet café sa barangay Tabunok, dakbayan sa Talisay.
Ang biktima giila nila ni PO1 Aquiles Cabando ug PO3 Joel Rosales sa homicide section nga si Victoriano Abatayo taga sitio Sangi sa nahisgutang barangay ang daling gidala sa Talisay District Hospital apan tungod sa kahimtang niini gibalhin sa Vicente Sotto Memorial Medical Center niining dakbayan.
Usa sa kauban sa suspetsado kinsa menor de edad ang nasikop ni PO1 Carlos Baluado, polis sa Talisay kinsa nadestino isip beat patrol diha sa Tabunok.
Nakuha ni Baluado gikan sa maong menor de edad ang usa ka kalibre .38 nga revolver ug duha ka buhing bala sa maong kalibre.
Si Baluado sa pakighinabi niini sa Banat News kagahapon mibutyag nga ang mga tawo nga nagtapok diha sa lugar nga nahitaboan ang misulti kaniya nga adunay gipusil hinungdan nga dali siyang mitubag sa maong alarma.
Matud niini nga tulo ka mga lalaki ang naglumba sa pagpanagan ug naapsan niya ang nahisgutang menor diha na sa sitio Neighborhood apan ang duha ka kauban niini ang daling nakasakay og motorsiklo.
Ang nahisgutang menor de edad sa pakighinabi niini sa Banat News miangkon nga sakop siya sa Crips.
Matud niini nga usa sa iyang kauban nga si “Doods” ang mipusil sa biktima.
Ang maong menor mipasangil nga si “Doods” ang igo lang usab nga mibawos tungod kay gipusil kini sa biktima niadtong Domingo.
Sa laing bahin, si Cabando sa pakighinabi niini sa Banat News kagahapon nagkanayon nga si Abatayo ang diha sulod sa internet café nagduwa apan kalit lang nga misulod ang suspetsado ug dayong pusil ngadto sa biktima.