Otap vendor gipatay sa Carbon

Usa ka otap vendor  namatay dihadiha  dayon  human mabiktima sa pagpamusil kagahapon sa alas 9:30 sa buntag diha sa M. L. Quezon Boulevard Avenue luyong bahin sa Unit 3 Carbon Market, barangay Ermita.

Ang namatay giila sa kapulisan nga si Ray Miramontes, 32, minyo, nga taga dalan  Arellano  boulevard, barangay San Roque ning dakbayan.

Sa imbestigasyon sa mga sakop sa Cebu City Homicide Section ang biktima gikatahong nakit-an na lang sa mga tawo diha sa luyo nga bahin sa Unit 3 Carbon Market nga nagkadugo nga nagbuy-od sa dalan human usab sa usa ka boto sa armas.

Usa ka Felix Estoconing nga nanilhig sa luyong bahin ang  miasoy sa kapolisan nga human nila madungog ang boto sa armas dali nilang gilantaw ang dapit ug nakita na lang niini nga patay na ang biktima samtang wala usab sila makakita sa mamumuno.

Ang biktima gikatahong adunay samad pinusilan sa ulo niini samtang na-recover usab sa kapolisan ang usa ka kabhang sa .45 kalibreng pistola duol sa crime scene.

Apan ang nakahatag og labad sa ulo sa kapolisan mao nga walay mga tawo sa nahisgutang dapit ang mikooperar sa imbestigasyon labot na sa pag-ila sa mamumuno bisan paman kun dunay daghang tawo ug adlaw'ng dako nahitabo ang krimen.

Dugang nakuhang impormasyon sa kapolisan nga ang biktima gikatahong tiggamitan usab kini sa ginadiling drugas ug magpalitan sa nahisgutang lugar.