Tulo ka balay nangaugdaw

Naugdaw ang tulo ka mga balay dihang kalit lang miulbo ang kalayo sa nahitabong sunog kagahapon sa buntag sa dalan H. Abellana sa barangay Cubacub, dakbayan sa Mandaue.

Ang maong mga balay nga naugdaw sa sunog kagahapon mao ang gipanag-iya nila ni Marciano Niez, Trinidad Niez, Jojie Niez nga pulos residential ug ginama sa mga gaay.

Si FO3 Jesuel Pesquera nga nahinabi sa Banat News miingon nga nagsugod ang kalayo sa kisame sa panimalay ni Marciano Niez ug dali kining mikaylap sa sikbit nga mga balay sa mga kabanay niini.

Dugang pa niya nga ilang nadawat ang alarma alas 8:52 sa buntag  ug nakontrol paglabay sa 3 minutos ug hingpit nilang napawong sa paglabay sa 43 minutos.

Si Chief Inspector Oscar Mayol mipaubos sa 2nd alarm sa maong sunog ug hingpit kini nilang napawong sa paglabay sa 43 minutos.

Matud pa ni FO3 Pesquera nga si FO2 Cefriano Codilla Jr. nga maoy duty investigator  mibanabana nga mokabat lamang sa P50,000 ang danyos.

Nagtuo si Codilla nga faulty electrical wiring ang sinugdanan sa kalayo sanglit si Juluis Nies nga maoy unang nakamatikod sa kalayo ang maoy nagtug-an nga nagsugod sa kuryente sa kisame ang sunog.